Os tres protagonistas

A gravación será ás 17.00 deste venres nos Estudios Bruar, da Coruña. A versión orixinal da canción de Luís Emilio Batallán acompañarase, desta volta, dunha orquestración especial para facela máis cinematográfica. Este tema e as montañas de Valdeorras tecen o pano de fondo de Pradolongo

Pradolongo é a historia de tres amigos da infancia: Raquel (Tamara Canosa, colaboradora de ANT Diario), Martiño (Rubén Riós), e Armando (Roberto Porto) acaban de cumprir a súa maioría de idade, e prepáranse para un verán na aldea: festas, tardes no río... Pero os sentimentos amorosos e os intereses de clase, ao aparecer a posibilidade da venda de Pradolongo, un prado de alta montaña pertencente á familia de Martiño, á louseira do pai de Armando, cambian a relación entre eles.

Ignacio Vilar rodou a historia entre o 16 agosto ao 28 de setembro de 2007, na comarca ourensá de Valdeorras: a lagoa de Ocelo en Pena Trevinca, as canteiras de lousa no concello de Carballeda de Valdeorras, a aldea de Robledo en Vilamartín, que o autor xa reflectira nos seus traballos Un bosque de música e A aldea: o antigo e o novo, ademais do dialecto de transición entre o galego lucuauriense e o berciano, son algunhas das marabillas que configuran o escenario.

Aquí podemos ver un adianto: 

Actores consagrados e novas promesas no elenco

Para escoller os novísimos actores, realizouse un casting polos institutos da Rúa, O Barco, Carballeda, Viana do Bolo, Quiroga, O Carballiño, Ribadavia, Verín e Xinzo da Limia, entre rapaces e rapazas de entre 16 e 18 anos, galegofalantes e con dotes interpretativas. De aí saíron Roberto Porto, Cristina Rodríguez e Laura Álvarez.

Outros actores xa consolidados como Mela Casal, Gonzalo Rei Chao, Carlos Sante, Antonio Mourelos, Belén Constenla e Pepo Suevos completan o elenco, ademais de Sheila Fariña, Olalla Salgado, Ricardo de Barreiro, Marián Bañobre, Fernando Dacosta, Marcos Vieitez, Antón Olmos, Avelino González, Manolo Cortés, Elena Seijo, Isabel de Toro e Paulo Serantes.